Merk Selamet Datang Lahat Lah Buruk Nian

0
383

Pagi tadi Mangcek Ham sam Bikcek Vita sengajo jalan pagi. Maklum, duo laki bini tu lah agak berumur, jadi nak ngelatih kaki biar dak tekeno asam urat.

Sampe depan Kantor Sat Lantas Lahat, Mangcek samo Bikcek ketemu samo Mang Dani yang kebetulan lagi jalan santai jugo.

Dak lamo pas ado batang jering deket tikungan, wong tigo tu istirahat sambel ngeluruske dengkul.

‘’Mangcek kau jingok tu, merk selamet datang samo selamet jalan di daerah kito ni lah buruk nian, sebab lah banyak yang koyak. Kalau aku kebetulan lah jadi jeme Lahat rasonyo malu jugo. Apolagi kalau ado keluargo dari jauh, dio galak ngatoi lah buruk nian merk tu, payo gantilah pulok,’’ kato Mang Dani sambel tangannyo nunjuk ke arah merk selamet datang.

‘’Ai maseh awas jugo mato kau tu Mang. Iyo nian ado benernyo yo. Padahal, itu kan ikon kito sebab wong masuk samo yang nak keluar kabupaten pastilah jelek ke pucuk. Memang harusnyo diganti biar dak jadi katoan uwong,’’ uji Mangcek.

‘’Iyo aku setuju bae apo kamu omongke beduo tu. Kalu pacak sekalian tiang-tiangnyo tu dicet biar bagus jugo jingoknyo,’’ timpal Bikcek Vita.

Sekitar setengah jam istirahat, wong betigo  tu langsung bepisah. Mangcek samo Bikcek langsung ke pinggir jalan arah Sungai Lematang nak beli bubur ayam. Sedangke si Mang Dani ke toko panceng sebab siangnyo dio nak manceng ke kolam pemancingan dr. Nova.

Kiriman: idham

Editor/Posting : Imam Ghazali