Mangcek Irwansyah Lah Punyo Firasat Siapo Gubernur Sumsel 2018-2023

0
409
ilustrasi net

Lah lemak jadi Walikota Pangkal Pinang, ternyata Mangcek Irwansyah ninggalkennyo. Sebab dio lah punyo firasat yang nak bakalan jadi Gubernur Sumsel periode 2018—2023 mendatang.

‘’Iyo nian apo itu Cek. Kau tu cak lah jadi peramal bae,’’ kato Cek Din ke Mangcek Sum kemarin sore pas lagi beteduh depan kantor gubernur karno ujan deres.

‘’Kau ni cak apo bae. Aku ni bukannyo peramal apolagi dukun, mano boleh kito gunoke peramal samo dukun tu, sebab sesep dikit kito ni gek jadi syirik. Aku tu cuman jingok kenyataannyo bae. Kau jingoklah Mangcek Irwansyah tahan nyebrang laut cuman nak sekedar jadi Wagub Sumsel dampingi Mang Wari. Kalu itung-itungan masih lemaklah jadi Wako Pangkal  Pinang daripada jadi Wakil Gubernur. Tapi karno firasat si Mangcek Irwan tu yakin pasangannyo bakal menang, mangkonyo dio galak bae jadi wakil gubernur,’’ kato Mangcek Sum.

‘’Tapi kalu firasat itu salah, apo dak rugi Mangcek Irwansyah nyo. Kan rasonyo besak jugo modalnya nak jadi wakil gubernur tu, kalu uwong cak kito ni pasti dak bakalan sanggup,’’ uji Cek Din sambel melotot.

‘’Biaso bae mato kau tu kalu ngomong Din….Kau tau dak yang namonyo nyalon yo samo dengan betarung. Yang namonyo betarung tu, katek menang katek kalah. Katek rugi, jugo katek untung. Puas betarung itulah yang namonyo pemenang. Cuman petarung cak Mangcek Irwansyah tu pastilah diperingtungke mateng-mateng jauh-jauh ari. Kalu bukan karno ado firasat menang, yo rasonyo dak bakalan galak dio nak nyebrang Laut Bangka samo Sungai Musi … Din. Dio tu galak nyalon wagub karno ado firasat menang. Kan beda betarung semangat menang dengan betarung semangat pasti kalah. Aku yakin, kalu dio ado firasat kalah, janganke nak nyebrang sungai, ngelewati kambang iwak bae pasti dak galak. Tapi karno Mangcek Irwan tu ado firasat menang, Laut Bangka bae lagi disebranginyo,’’ uji Mangcek Sum panjang lebar.

Denger cerita mak itu,  Cek Din jadi melongo.

‘’Kalu mak itu, masuk di akal jugo yee kalu di Mangcek Irwansyah punyo firasat mak itu. Kalau mak itu, pas pilgub kagek aku nak milih dio baelah samo Mang Wari. Sebab aku yaken Plembang biso lebih maju, terus kota samo kabupatennyo jugo bakalan biso makmur,’’ jawab Cek Din.

‘’Itu terserah awaklah Cek, aku idak nak melok-melok masalah milih siapo. Aku cuman ngomongkenyo bae, tapi kan awak jugo biso nilai kebenerannyo. Apolagi kito milih masih lamo, kalu dak salah tanggal 27 Juni kagek. Jadi awak biso punyo waktu untuk bepeker nak milih siapo,’’ kato Mangcek sambel ngeluarke rokoknyo dari kantong depan. By: ig