HeadlinePolitikPrabumulihSuara Hati

Lum Tentu Ridho Menang Lawan Kotak Kosong

Kota Prabumulih mak ini ari jadi sorotan. Sebab selain pelitnyo transparansi informasi, jugo pas pilkada kagek, cuman di Prabu yang ado paslon sikok alias tunggal. Sementaro daerah laen di Sumsel ni dak katek.

‘’Tapi aku yaken, Ridho lum tentu menang nak melawan kotak kosong. Sebab uwong pasti banyak bepeker, ngapo nian biso mak itu,’’ uji Mangcek.

‘’Aku dak tahu jugo. Yang pasti sekarang ni, ado yang dukung Ridho, ado jugo yang idak dukung alias maseh nak meleh kotak kosong. Kan meleh kotak kosong jugo boleh dan memang ado aturannyo. Jadi idak salah, kalau wong prabu nak melehnyo,’’ jawab Mang Syarif.

‘’Nah ngapo mak itu. Kan setahu aku selamo Prabumulih dipimpin Ridho banyak jugo kemajuannyo. Jadi wajar bae kamek nak meleh dio lagi,’’ kato Mangcek.

‘’Ai kendak kau lah. Tapi yang pasti banyak jugo yang nak meleh kotak kosong. Sebab Prabumulih ni dari dulu maseh mak inilah, dak katek yang berubah. Kalu ado cuman sedikit nian, rasonyo dak cocok dengan anggaran yang ado. Kalu meleh kotak kosong kan biso jadi sejarah di Indonesia Terus pasti Prabu jadi sorotan dan tambah ngetop, jadi baru ado calon walikota laen yang pasti muncul,’’ uji Mang Syarif.

‘’Iyo bener jugo yo. Tapi kito jugo dak pacak nak makso uwong meleh kotak kosong kan. Ini namonyo alam demokrasi, siapo bae bebas nak meleh,’’ kato Mangcek.

‘’Iyolah pulok Mangcek. Kito dak biso nak makso uwong melek Ridho apo nak meleh kotak kosong. Cuman aku yaken bae, wong dusun aku lemaklah meleh kotak kosong, kalu bae kagek pilkada  Prabu ni pacak diulang lagi, jadi ado calon laen. Maksud aku biar ado perbandingan. Kan lemak kalau banyak calon. Kalu cuman sikok kesannyo tu arogan. Kau tahu dewek yang namonyo arogan, bener salah maseh nak dio tulah yang menang,’’ jawab Mang Syarif.

‘’Jadi kau setuju kalu ado pendapet yang ngomongke Ridho tu lum tentu menang lawan kotak kosong?’’ tanyo Mangcek.

‘’Iyolah aku setuju bae. Kan pilkada belum dimulai, siapo bae punyo hak untuk ngeluarke pendapetnyo. Terus kalu aku peratiin, idak seluruhnya uwong-uwong tu nak meleh Ridho galo. Nah kalau sudah mak itu, besak kemungkinan si Ridho pacak kalah,’’ uji Mang Syarif lagi.

Daripada bedebat dak keruan, akhirnyo duo sohib itu abes ngopi depan warung Kantor Pemkot Prabumulih, langsung keliling Kota Prabu nak jingok makmano kondisi politik di Kota Nanas itu. Kiriman/Posting : IG

 

 

 

Related Articles

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Back to top button