HeadlineSuara Hati

Guyonan Mangcek Sum: Ishak-Wari Vs Deru-Mawardi

Minggu kemaren, kebetulan bae Mangcek Sum melok ponaannyo jalan-jalan ke dusun yang ado di Sumsel. Memang idak segalo dusun yang ado di Sumsel pacak dijingok. Cuman, setiap dusun yang namonyo foto Ishak samo Deru yang katonyo nak jadi Gubernur Sumsel 2018—2023 banyak nian. Pokoknya foto duo jawara itu betebengan galo.

‘’Nah nurut kau, siapo Mang yang bakalan kuat. Maksud aku antaro Ishak samo Deru tu,’’ uji Mang Syarif negurke Mangcek Sum yang tejingok sedang melamun.

‘’Ai kau ni Mang Syarif. Kalu negor uwong tu pake assalamualaikum apo. Jangan langsung mak itu. Cak tau nian apo yang kupekerke,’’ uji Mangcek Sum.

‘’Ai sudahlah Mang, aku tu lah tau siapo awak tu. Pasti mekerke gubernur kito kageknyo kan, yang nak gantike Pak Alex. Jadi lemaklah langsung kutegor bae,’’ kato Mang Syarif, jawabke omongan Mangcek Sum.

‘’Boleh lah kau Rif, pinter jugo kau nebak pekeran aku. Iyo bener nian aku sedang mekerke siapo gubernur kito yang pacak gantike Pak Alex yang  lah duo periode. Kalu kujingok-jingok Caknyo Deru samo Ishak yang paleng kuat sekarang ini,’’ kato Mangcek Sum.

‘’Ai kau ni dak boleh mak itu. Yang namonyo politik kadang dak pacak ditebak sekarang. Tapi kau jugo dak salah. Sebab kalau kujingok, aku jugo sependapet dengan kau Cek,’’ uji Mang Syarif.

‘’Memang kabarnyo ado jugo Dodi samo Giri. Tapi fotonya dak banyak tepampang di dusun-dusun. Apo belum bae yo. Mangkonyo kalu sekarang caknyo yang kuat calon gubernur kito tu yo Ishak samo Deru tulah,’’ kato Mangcek Sum lagi.

‘’Terus.. lah kepalang ni Cek. Nurut kau, siapo yang bakalan menang kageknyo antara Ishak samo Deru?’’ uji Mang Syarif.

‘’… Ai kau ni… kato kau tadi politik susah nebaknyo. Sekarang kau malah nanyo mak itu, memangnyo aku ni apo pacak nebak mak itu,’’ uji Mangcek Sum sambel ngudut.

‘’Yo mano tau aku. Inget dak, waktu kau nebak nomor yang keluar tempo ari, kan pas nian. Bukan sekali duo kali kau nebaknyo bener. Nah aku yaken kalu Mangcek nebak yang bakalan nak jadi gubernur caknyo juga idak meleset,’’ kato Mang Syarif, dak galak ngalah.

‘’Nah kau ni, tapi ini cuman nurut aku bae yo Mang Syarif. Mak ini, kalu aku jingokke peta kekuatan, memang dak pacak dipungkiri, Deru memang kuat nian. Apolagi dio pasangan samo Mawardi yang pernah jabat bupati duo periode jugo bekas ketua dprd oki. Tapi ado cumannya Mang…, kalu Ishak pasangan samo Wari yang sekarang juga masih bupati, aku yakin Ishak pacak menang tipis..,’’ kato Mangcek Sum.

‘’Menang tipis apo menang tebel yo samo bae, namonyo jugo menang. Tapi belum  tentu kan Ishak pasangan samo Wari. Kau jingoklah, fotonyo bae dewek-dewek, terus duo-duo nak jadi gubernur galo. Cak dak galak ngalah. Jadi makmano itu Mangcek,’’ uji Mang Syarif.

‘’Ai berejo oi makmano caronyo. Kalu itu bukan gawean  aku lagi. Bila perlu ngadep oi samo prabowo ha ha ha,’’ kato Mangcek Sum.

‘’Nah, makmano  dengan Dody samo Giri, Mangcek,’’ tanyo Mang Syarif lagi.

‘’Nah ini yang belum tepekeran samo aku…lokak suaro jadi tebagi… kageklah kito ngomongke itu.. aku nak beli minyak duken yo, sebab Bicek kau nak goreng pempek,’’ uji Mangcek Sum sambel pamet ke Mang Syarif. ***** by: ig

 

Related Articles

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Back to top button