Cek Din Sedih, Marwan Dak Jadi Nyalon

0
278

Pagi tadi, pas Mangcek samo Cek Nang lewat depan rumah Cek Din, dak sengajo dia jingok muko sohib karibnyo tu sedih nian. Padahal sekarang ni belumlah bulan tuo.

‘’Oi Cek Din ngapo awak ni cak kejingokan sedih nian. Yang sudah-sudah, jangan pulok nak jadi pekeran. Kalu gek awak tu cepet tuo,’’ kato Mangcek.

‘’Iyo nian Din, kalu kau lah tuo, lokak katek lagi kawan kamek mancing. Saro kamek ni,’’ simbat Cek Nang jugo.

‘’Ai kamok ni. Aku sedih bukan karno katek duet. Aku sedih tu karno si Marwan tu dak jadi melok nyalon di Pilkada Lahat. Padahal aku kemaren lah nyumbang duet recehan buat dio nyalon. Untung bae recehan, kalau duet kertas kan tambah sedih aku tu,’’ jawab Cek Din.

‘’Ooooo, itu masalahnyo. Biaso bae Cek Din. Mungken dio ado pertimbangan laen. Kito kan mano tau alasan dio dak nyalon. Kan maseh ado limo taun lagi kalu dio nak nyalon,’’ uji Mangcek.

‘’Ai kau ni Mangcek, kelamoan igo 5 taun baru nak nyalon. Kalu lah tuo si Mancyur tu,’’ kato Cek Nang sambel ngirup kopi yang barusan disedioke bini Cek Din.

‘’Terus terang bae Mengcak samo kau Cek Nang. Si Mangcek Mansyur bukannyo apo-apo aku, dio dak nyalon jugo itu urusan dio. Tapi aku mekerke nasib PNS di Lahat ni makmano ke depannyo. Sebab setau aku, kalu nyalon terus menang, harepan aku nasib PNS di Lahat pacaklah berubah. Terus pembangunannyo jugo biso lebih maju lagi dari sekarang,’’ uji Cek Din sambel ngisep rokoknyo dalem-dalem.

‘’Sekarang mak ini. Kito percayoke bae samo paslon yang ado. Siapo menang kito dukung untuk bangun Bumi Seganti Setungguan. Yang kalah yo harus nerimo. Sebab namonyo pilkada pasti ado menang, ado kalah,’’ jawab Mangcek.

‘’Iyolah kalu mak itu. Setuju aku Mangcek. Pokoknyo kito jingokke bae, yang menang kito dukung, yang kalah tetep kito hormati karno lah ngerameke pilkada daerah jeme ni,’’ uji Cek Din, agak semangat.

‘’Oh yo, kalu katek Marwan. Siapolah kiro-kiro yang nak besaing kuat,’’ uji Cek Nang sambel ngambek pempek dos di sebelas gelas kopi yang tinggal setengah isinyo.

‘’Kalau kato aku, caknyo Nopran samo Bursah yang besaing kuat. Kalu yang laen caknyo lum kejingok’an kuatnyo,’’ simbat Cek Din, tambah semangat.

‘’Caknyo mak itu… kalu bahas itu aku lagi lum semangat. Sebab aku nak manceng bae dulu, pekeran aku idak ke sano sekarang ini. Tapi yang pasti, karno Marwan dak jadi maju, pilkada Lahat ni jadi kurang geregetnyo,’’ jawab Mangcek.

“Oooooooooo,’’ uji Cek Din samo Cek Nang bebarengan. Kiriman: idham

sumatranews.co.id1 id : 10717 Under Article