Berejo RMD, Banyak Wong Jual Jasa ke Paslon

0
343

Mak ini ari kalu kito dak pacak gunoke kesempatan, pacak kito dak makan. Nah kalu di Bumi Seganti Setungguan, pacak-pacaklah kito tu bejual jasa ke paslon yang nak bakalan daftar ke KPU.

Pokoknyo kito daftar ke timses paslon, terus dapet baju, samo dapetlah lokak RMD (rokok, makan, duet). Duetnyo memang dak besak, cuman jadilah pacaklah dibelike rokok lagi.

‘’Jadi kau jugo melok mak itu apo Cek Nang. Kalu ado lokak lemak tu yo ngajak-ngajak lah. Aku kiro dak apo, kito kan cuman jual jasa manjangke barisan paslon, biar rame, apolagi kalu ado artisnyo. Nah lokak tambah semangat kito asal dak ketauan bini… ha ha ha,’’ kato Cek Din.

Denger mak itu, Mangcek antara setuju dengan idak. Setujunyo karno gawe mak itu sah-sah bae sebab kito samo bae dengan jual jasa. Terus kapan lagi nak ngenoi para paslon, sebab kalu mereka lah jadi kebanyakan lah lupo samo uwong banyak. Dak setujunyo, yo kalu Cek Din samo Cek Nang melok ke seluruh calon. Sebab itu nunjukke dak katek pendirian alias masang aji mumpung.

‘’Kalu pacak kito tu jangan mak itu oi lur. Cak kau Cek Din kan galak ke mesjid, harusnyo jago bae namo baek tu. Pasti ado rizki laen lah. Kau jugo Cek Nang, aku jingok kau tu sekarang lah aktif nian di mushola sampeng rumah. Jadi dak lemak kalu gawe mak itu dimelok’i. Uwong memang dak ngomong, tapi sebenernyo dio ngatoi kito dalem ati. Nah cuman kalu kamu beduo melok’i sikok paslon, yo aku setuju bae. Sedangke melok ke laen sekedar ladas nyari kawan yo dak apo, itu samo bae manjangke tali silaturahmi,’’ kato Mangcek panjang lebar.

Denger mak itu, Cek Din samo Cek Nang dak pacak nak ngomong lagi. Dak lamo dari situ, uwong duo tu langsung ngacer. Sementaro Mangcek ketawo bae jingok’i duo sohibnyo itu. Sedangke untuk namo Marwan Mansyur yang semulo digadang-gadang bakalan maju, caknyo dak jadi. Sebab namo dio lah digantike samo Haryanto.

Daftar Paslon ke KPUD Lahat:

Tanggal 8 Januari 2018

Jam 13.00 WIB

Nopran Marjani – Herliansyah

Jam 15.30 WIB

Purnawarman Kias – Rozi Ardiansyah

 

Tanggal 9 Januari 2018

Jam 10.30 WIB

Bursah Zarnubi – Parhan Berzah

Jam 13.00 WIB

Hapit Fadli – Erlansyah

 

Tanggal 10 Januari 2018

Jam 09.00 WIB

Cik Ujang – Haryanto

Jam 13.00 WIB

Dodo Arman – Sutrisno.

Kiriman             : idham

Editor/Posting : imam ghazali