Kotak Kosong VS Ridho

200
ilustrasi net

Baru kali ini tejadi di Sumsel, Cawako melawan kotak kosong. Kalu menang wajar, tapi kalu kalah jelas dak wajar. Tapi kalu kito jingok tahun 2018 ini, ado 19 daerah di NKRI yang melawan kotak kosong. Salah sikoknyo di Prabumulih Sumsel.

Karuan bae, Mangcek Sum samo sohib kentalnyo Mang Don laju ngomongke masalah ini.

‘’Kalu nurut aku, ngapo ado kotak kosong, itu nunjukke uwong tu dak galak ngambek pusing dengan politik. Sebab biasonya warga yang mak itu ngeraso ado kepala daerah samo dak katek samo bae,’’ kato Mangcek Sum.

‘’Mungken bae Lur. Tapi ado jugo yang beranggepan pimpinan selamo ini cak Wako Prabu memang bagus. Artinyo pas dio maju katek uwong laen yang galak besaing, sebab dak bakalan nak menang,’’ jawab Mang Don.

‘’Iyo bener jugo. Tapi jadi dak lemak jugo, sebab yang namonyo pilkada kan rame, calonnyo lebih dari sikok. Kalu mak ini jelas dak lemak. Jangan-jangan gek banyak yang dak galak meleh alias golput. Sebab yang namonyo meleh kan lebih dari sikok calon. Kalu cuman sikok bae itu namonyo nunjuk langsung, bukan meleh. Terus untuk apo ado panitia, ado KPUD, ado Panwaslu, ado TPS, ado Linmas. Maksud aku, lembaga samo panitia itu jadi kurang geregetnyo,’’ uji Mangcek Sum.

‘’Yo sebenernyo aku dewek lagi bingung. Apo aku bae yang maju, jelas dak nyucukupi syarat. Sekolah bae dak tamat. Tapi nak makmano lagi. Kito jingok bae makmano. Kalu KPUD samo yang laennyo jelas maseh banyak bae gawe, yo minimal pas untuk Pileg 2019 kagek,’’ kato Mang Don sambel ngudut.

‘’Nurut awak tu, berapo persen Ridho pacak menang samo kotak kosong tu. Sebab aku dewek maseh bingung, kotak bae nak dilawan, pecak katek gawean laen ha ha ha ha ha,’’ uji Mangcek Sum.

‘’Ai dak taulah aku. Aku dewek jugo dak lagi nak ngeluruinyo,’’ jawab Mang Don sambel pegi.

Kiriman : ig

LEAVE A REPLY

Please enter your comment!
Please enter your name here